Кыргыз Республикасынын Президенти Садыр Жапаров 12-февралда Азия инфраструктуралык инвестициялар банкынын президенти Цзоу Цзяи менен жолугушуу өткөрдү. Жолугушууда индустриалдаштырууга, транспорт логистикасын өнүктүрүүгө жана Кыргызстандын транзиттик потенциалын чыңдоого багытталган ири долбоорлор боюнча биргелешип иштөө мүмкүнчүлүктөрү талкууланды. Ошондой эле айыл чарба жана энергетика тармактарындагы демилгелер каралды.
Мамлекет башчысы индустриалдаштыруунун өлкөнүн эл аралык аренадагы ордун чыңдоонун жана өсүүсүнүн негизги багыттарынын бири экенин белгиледи.
Ал жогорку кошумча наркка ээ тармактарды өнүктүрүүнүн, кайра иштетүүнүн көлөмүн көбөйтүүнүн жана өнөр жайды модернизациялоонун зарылдыгын белгилеп, АБИИни бул багытта активдүү кызматташууга чакырды.
Садыр Жапаров транспорт инфраструктурасын өнүктүрүүнүн маанилүүлүгүнө көңүл бурду, Кыргызстанды регионалдык хабга айландыруу боюнча стратегиялык максатты баса белгиледи. Ал бул тармакта инфраструктуралык долбоорлорду ишке ашыруу өлкөнүн атаандаштыкка жөндөмдүүлүгүн жогорулатат жана экономикалык өсүш үчүн жаңы мүмкүнчүлүктөрдү түзөт деп билдирди.
Алдынкы милдеттердин бири электр энергиясынын жетишсиздигин жоюу экенин айтты. Президент генерациялоо кубаттарын көбөйтүү, энергетикалык инфраструктураны модернизациялоо жана энергияны үнөмдөө боюнча ниеттерин белгиледи.
Ал ири энергетикалык долбоорлорду ишке ашыруу өлкө үчүн стратегиялык мааниге ээ экенин белгиледи.
Мамлекет башчысы жол инфраструктурасына инвестиция салуунун маанилүүлүгүн белгилеп, транспорттун жеткиликтүүлүгүн жогорулатуу жана региондорду өнүктүрүү үчүн АБИИни негизги долбоорлор боюнча өнөктөштүктү кеңейтүүгө чакырды.
Цзоу Цзяи, өз кезегинде, АБИИ Кыргызстанды маанилүү стратегиялык өнөктөш катары карап жатканын белгилеп, республиканын банктын негиздөөчүсү катары статусун баса белгиледи.
Ал өлкөнүн экономикалык саясатын жана анын социалдык-экономикалык өнүгүүсүндөгү оң динамиканы жогору баалады.
АБИИнин президенти учурдагы долбоорлорду каржылоону улантууга жана Кыргызстандын приоритеттерине жооп берген жаңы демилгелерди колдоого даяр экенин билдирди. Ал инфраструктураны өнүктүрүү, транспорт-логистикалык байланыштарды, соода жана инвестицияларды, ошондой эле жеке секторду колдоо боюнча кызматташуунун маанилүүлүгүн баса белгиледи.
Камбар-Ата ГЭС-1 куруу долбоору да көңүл борборунда болду. АБИИнин башчысы анын өлкөнүн энергетикалык коопсуздугун жогорулатуу үчүн маанилүүлүгүн белгилеп, банктын каржылоого катышуу мүмкүнчүлүгүн карап чыгууга даяр экенин билдирди.
Мындан тышкары, Цзоу Цзяи банк Кытай – Кыргызстан – Өзбекстан темир жол долбоорун колдоонун мүмкүнчүлүктөрүн изилдөөгө даяр экенин айтып, кыргыз тараптан мындан аркы иш үчүн конкреттүү сунуштарды күтө турганын билдирди.
Жыйынтыктап айтканда, ал АБИИ Кыргызстанды өнүктүрүү жана анын приоритеттүү долбоорлорун ишке ашыруу үчүн финансылык колдоо мүмкүнчүлүктөрүн карап чыгууну уланта турганын баса белгиледи.
