Жогорку Кенештин спикери катары биринчи сөзүндө Марлен Маматалиев президент Садыр Жапаровго жана депутаттарга көрсөтүлгөн ишеним үчүн ыраазычылык билдирди. Ал «бардык күч-аракетимди жана топтолгон тажрыйбамды мамлекеттин пайдасына жумшайм. Биз бир команда болуп иштешибиз керек» деп белгиледи.
Спикер президенттин жетекчилиги астында жүргүзүлгөн реформалар өлкөнүн экономикасын жакшыртууга жана коррупцияга каршы күрөштү күчөтүүгө чоң салым кошконун, бул болсо Кыргызстандын эл аралык имиджине оң таасир бергенин баса белгиледи. Маматалиев Жогорку Кенеш бул өзгөрүүлөрдө маанилүү роль ойногонун айтты.
Ал бардык депутаттарга жана жарандарга бирдей мамиле кылуунун зарылдыгына өзгөчө көңүл бурду. «Биздин өлкө региондорго бөлүнбөй, бир бүтүн бойдон калуусу керек. Мен округдарга чыгып, адамдарды кызыктырган маселелер менен алектенүүнү пландап жатам. Жыл ичинде бардык 30 округду кыдырып чыгам», - деп кошумчалады жаңы спикер.
