Депутат Кундузбек Сулайманов архитектура жана курулуш тармагындагы кесиптик кадрлардын жетишсиздиги тууралуу маселе көтөрдү. Өз кезегинде депутат Бахридин Шабазов министрликтин кызматкерлеринин айлык акысынын эсептөө ыкмаларына кызыгып, министр Нурдан Орунтаев мурда 500 миң сомдук айлык тууралуу айтып өткөнүн эске салды. Талантбек Иманакун уулу министрликтин бөлүмдөрү өзүн-өзү каржылоо принципи боюнча иш алып барганын, айлык акынын ай сайын эмес, аткарылган иштерге жараша берилерин белгиледи.
Комитеттин төрагасы Куванычбек Конгантиев мындай ыкмага макул эместигин билдирди. Ал министрликтин каржылоо принциптерин кайра карап чыгуу зарылдыгын баса белгилеп, бул тармакта коррупция жана монополиялашуу боюнча мүмкүн болгон коркунучтарды көрсөттү. «Көзөмөлдөө жана башкаруу функциялары бар мамлекеттик орган өзүн-өзү каржылоодон көз каранды болбошу керек», — деп кошумчалады ал.
Мындан тышкары, комитеттин мүчөлөрү курулуш тармагында бааларды туруктуу мониторингдөө жана жөнгө салуунун маанилүүлүгүн, турак жайдын жеткиликтүүлүгүн камсыз кылуу үчүн чараларды кабыл алуунун зарылдыгын, ошондой эле бул тармак үчүн квалификациялуу адистерди даярдоонун маанилүүлүгүн талкуулашты. Мүлктү долбоорлоо жана куруу үчүн уруксат берүү документтерин берүү системасын жакшыртуу маселелери да жыйындын күн тартибине коюлду.
