Жаңы 110/35/10 кВ «Суу-Башы» жогорку вольттуу подстанциясынын салтанаттуу ачылышы Кыргызстандын энергетика министри Таалайбек Ибраевдин Баткен облусуна болгон визити учурунда өттү.
Ачылыш учурунда министр Т. Ибраев электр энергиясын колдонгондордун санынын өсүшү кубаттуулуктарды жана генерацияны актуалдаштырууну талап кылат экенин белгиледи. «Урматтуу бүгүнкү иш-чаранын катышуучулары! 2025-жылы көптөгөн подстанциялар курулду, ири ГЭСтердеги гидроагрегаттарды реконструкциялоо боюнча иштер жүргүзүлдү, ошондой эле кичи ГЭСтер жана күн энергиясы станциялары пайдаланууга берилди. Ар жылы электр энергиясын колдонгондордун саны өсүп, жаңы турак жай комплекс жана заводдор пайда болууда. Бул генерацияны көбөйтүүнү актуалдуу кылат. Ар бир жаңы подстанция калкты энергия менен камсыздоодо маанилүү роль ойнойт. Бул подстанция да элге кызмат кылат. Биз жетишкендиктерибиз менен токтоп калбашыбыз керек. Биздин максат — калкты жарык жана жылуулук менен камсыздоо», — деди министр.
«Суу-Башы» подстанциясы тейлей турган аймактын аянты 500 квадрат метрди түзөт. Проект ОАО «НЭСК» жана Баткен шаардык мэриясынын биргелешкен аракеттери менен ишке ашырылды, жалпы наркы 55 млн 758 миң сомду түзөт, анын ичинде:
• 19 млн 958 миң сом Баткен электр тармактары тарабынан сатып алынган кошумча материалдар үчүн;
• 35 млн 800 миң сом Баткен шаардык мэриясы тарабынан сатып алынган жабдуулар үчүн;
• курулуш иштерин Баткен электр тармактарынын күчтөрү аткарды.
Министрликтин маалыматы боюнча, подстанциянын пайдаланууга берилиши менен туруктуу жана сапаттуу электр энергиясы төмөнкү айылдарга жетет: Жаңы-Достук, өнөр жай зонасы, «Баткен Сити» турак жай массиви, 10 миң орунга ылайыкташкан жаңы стадион, Чет-Булак кварталындагы турак үйлөр, Бужум айылы, Россия Федерациясы тарабынан каржыланган курулуп жаткан орус мектеби, ошондой эле 2224 турак үй.
Мындан тышкары, бул маанилүү энергетикалык объект төмөнкү подстанцияларды электр энергиясы менен камсыздайт:
• Кара-Булак 35/10 кВ;
• Кара-Токой-1 35/10 кВ;
• Кара-Токой-2 35/10 кВ;
• Ширечь 35/10 кВ.
Подстанция 150 метр аралыкта жайгашкан жаңы 110 кВ «Айгуль-Таш – Борбордук» аба линиясына туташтырылган.
Иш-чаранын жүрүшүндө Баткен электр тармактарына өндүрүштүк мүмкүнчүлүктөрдү жогорулатуу жана авариялык кырдаалдарга ыкчам жооп берүү үчүн автотехника жана атайын техника тапшырылды:
• 3 JAC N 8 үлгүсүндөгү унаа;
• 1 JAC N56 үлгүсүндөгү унаа;
• 1 SHANMON үлгүсүндөгү экскаватор.
Тапшырылган техника энергетиктердин жумушун кыйла жеңилдетет, электр тармактарын тейлөө сапатын жогорулатат жана региондун тургундарын үзгүлтүксүз электр энергиясы менен камсыздайт.
Мындан тышкары, Т. Ибраев Баткен электр тармактарынын кызматкерлери менен жолугуп, кызматкерлер тарабынан көтөрүлгөн сунуштар жана маселелер, ошондой эле энергетика тармагынын учурдагы абалы, эмгек шарттарын жакшыртуу жана анын өнүгүүсү талкууланды. Министр суроолорго жооп берип, көтөрүлгөн маселелерди карап чыгуу боюнча көрсөтмөлөр берди.
