Жолугушууга жергиликтүү бизнес өкүлдөрү, тармактык ассоциациялар жана Нарын облусунун бийлик органдары катышты.
Региондогу ишкерлер өз иштерин өнүктүрүү үчүн негизги көйгөйлөрдү жана приоритеттерди аныкташты. Негизги көңүл финансылык ресурстарга жетүүнү, жеңилдетилген кредит берүүнүн мүмкүнчүлүктөрүн кеңейтүүнү жана бизнести колдоо үчүн цифралдык инфраструктураны өнүктүрүүгө бурулду.
Ошондой эле жолугушуунун катышуучулары процедураларды жөнөкөйлөтүү жана «бир терезе» принципи боюнча консультациялык кызматтарды көрсөтүү үчүн регионалдык цифралдык хабды түзүү боюнча идеяларды талкуулашты.
Мындан тышкары, айыл чарба продукциясын кайра иштетүү жана текстиль өнөр жайы тармактарында өндүрүштүк жана экспорттук кластерлерди түзүүнүн маанилүүлүгүнө басым жасалды. Бул жергиликтүү компаниялардын атаандаштыкка жөндөмдүүлүгүн жогорулатууга жана эл аралык рынокторго чыгууга жардам берет.
«Жолугушуунун жыйынтыгы боюнча Нарын облусунун ишкерлеринин сунуштары жыйынтыкталып, КООП-2030 программасынын долбоорун иштеп чыгууда эске алынат. Бул сунуштардын максаты — региондун өзгөчөлүктөрүн жана бизнес муктаждыктарын эске алуу менен практикалык жана максаттуу колдоо чараларын иштеп чыгуу», - деп белгиленди басма сөз кызматында.
