Талкуу учурунда депутат Дастан Бекешев субподрядчыларды тандоого байланыштуу маанилүү маселелерди көтөрүп, бул процесске байланыштуу коррупциянын тобокелдиги жана мамлекеттик жана жеке ишканалардын ортосундагы өз ара аракеттенүү боюнча өзүнүн тынчсыздануусун билдирди.
Депутат Суйунбек Омурзаков мамлекеттик сатып алуулар мыйзамынын 2-беренесинин 5-пунктундагы өзгөртүүлөрдү киргизүүнү жылына бир жолу гана чектеген жоболорго көңүл бурду.
Депутат Кундузбек Сулайманов сунушталган өзгөртүүлөрдү колдоп, мыйзам долбоору мамлекеттик сатып алууларды жүргүзүү процессинде республикалык жана жергиликтүү бюджеттердин каражаттарын натыйжалуу жана рационалдуу пайдаланууга жардам берерин белгиледи.
Депутат Медербек Алиев ошондой эле мыйзам долбоорунда сунушталган нормалар заманбап талаптарга жооп берерин айтты. Ал сатып алуучу уюмдар тендерлер учурунда арзан бааларга көңүл бурууга мажбур болушу, бул болсо сатып алынган товарлардын, иштердин жана кызматтардын сапатын төмөндөтүшү мүмкүн экенин кошумчалады.
Мыйзам долбоорунун максаты мамлекеттик сатып алуулар процедурасын жакшыртуу жана субподрядчыларды тандоодо тобокелдиктерди минималдаштыруу болуп саналат.
