Кыргыз Республикасынын өкмөтүнүн орун басары Эдиль Байсалов Япониянын Кыргызстандагы жаңы дайындалган элчиси Хирано Рюитимен жолугушту. Бул жолугушуу анын өлкөдөгү дипломатиялык миссиясынын башталышынын урматына уюштурулду, деп билдирет өкмөттүн басма сөз кызматы.
Жолугушуу учурунда Эдиль Байсалов Хирано Рюитини жаңы дайындалышы менен куттуктап, кыргыз-япон мамилелеринин ийгиликтүү өнүгүп жатканын белгиледи. Ал ошондой эле «Ортолук Азия + Япония» Диалогу алкагында мамлекет башчыларынын Биринчи саммитин өткөрүүнүн маанилүүлүгүн айтып өттү.
Тараптар активдүү саясий диалогдун маанисин талкуулап, Япониянын Кыргызстанды социалдык-экономикалык өнүктүрүүгө кошкон салымын, JICAнын колдоосу менен ишке ашырылган долбоорлорду белгилешти. Ошондой эле инвестиция, салык салуу, маданий жана туристтик байланыштар боюнча эки тараптуу кызматташтыкты кеңейтүү перспективалары талкууланды.
Жолугушуунун жыйынтыгы боюнча эки өлкө ортосундагы өнөктөштүктү тереңдетүүгө жалпы даярдык билдирилди.
