16-январдан баштап «Ала-Тоо Резорт» тоо-лыжа курортунда, Ысык-Көл облусунун Ак-Суу районунда, эл аралык деңгээлдеги фрирайд боюнча мелдештер башталды. Иш-чара жергиликтүү жана чет өлкөлүк өнөктөштөр менен биргеликте уюштурулган.
Турнирге даярдык 15-январда башталды, анда спортчулар «Каракол» базасында машыгуу өткөрүштү. Даярдык учурунда ошондой эле склондордо коопсуздук техникасына арналган атайын тренингдер өткөрүлдү.
Мелдештерге Кыргызстандыктарды кошкондо 20дан ашык өлкөдөн фрирайдерлер катышууда. Катышуучулар аматорлор, профессионалдар жана аялдар үчүн категорияларда атаандашып жатышат.
Спортчулар терең кар менен капталган татаал склондордо техникалык элементтерди жана секрүүлөрдү аткарышып, өздөрүнүн жөндөмдөрүн көрсөтүшөт. Судьялар тандалган маршруттун татаалдыгын, анын өтүү логикасын, коопсуздугун жана табигый рельефти колдонуу чеберчилигин баалашат.
Турнирдин жеңүүчүлөрү эл аралык фрирайд мелдештерине катышуу үчүн лицензия алышат. Судьялар тобуна Швейцариядан Гаэль Риборди, ошондой эле кыргызстандыктар Василий Немченко жана Тахир Даменбаев кирет, алардын бардыгы FWT (Freeride World Tour) системасында иштөө тажрыйбасына ээ.
Турнирдин негизги максаты Кыргызстанды кышкы туризмдин борбору катары илгерилетүү, экстремалдуу спорт түрлөрүн өнүктүрүү жана жергиликтүү жана эл аралык спортчулар арасында тажрыйба алмашуу үчүн платформа түзүү.
Кошумча маалымат: «Ала-Тоо Резорт» долбоору Борбордук Азиядагы эң ири тоо-лыжа кластерлеринин бирин түзүүнү камтыйт, ал «Жыргалан», «Ак-Булак» жана «Боз-Учук» курортторун бириктирет. Долбоордун алкагында 250 км лыжа жолдорун куруу, 7 миң жумуш ордун түзүү жана жылына 2 миллион туристти тартуу пландалууда.
Курулуш эл аралык экологиялык стандарттарды сактоо менен жүргүзүлөт. Курорт жыл бою иштейт, ал эми биринчи этаптын аякташы 2026-жылдын аягына чейин күтүлүүдө. Президент Садыр Жапаров долбоордун туризм жана экономика үчүн маанилүүлүгүн бир нече ирет белгилеген.
