2026-жылы Кыргызстанда Кытай Эл Республикасынын президенти Си Цзиньпиндин мамлекеттик визити өтөт. Бул тууралуу 2025-жылдын жыйынтыктарына арналган маалымат жыйынында тышкы иштер министри Жээнбек Кулубаев билдирди.
Министр Кыргыз Республикасы менен Кытайдын ортосундагы эки тараптуу мамилелердин деңгээлин 10 баллдан 11 балл деп баалаганын айтты. 2024-2025-жылдары эки өлкө арасында президент Садыр Жапаровдун Кытайга болгон визити сыяктуу көптөгөн жогорку деңгээлдеги жолугушуулар өткөрүлгөн.
«Өткөн 2025-жыл кыргыз-кытай мамилелери үчүн абдан жемиштүү болду. 2026-жылы биз Си Цзиньпиндин Кыргызстанга визити үчүн даярдык көрүү боюнча активдүү кызматташтыгыбызды улантабыз. Даярдык башталды, визиттин күн тартиби абдан тыгыз болот», — деп белгиледи Жээнбек Кулубаев.
