ЖК комитети «Мамлекеттик жана муниципалдык кызматтар жөнүндө» мыйзамга өзгөртүүлөрдү биринчи окууда жактырды

- 2026-жылдын 13-январында Жогорку Кенештин конституциялык мыйзамдар, мамлекеттик түзүлүш жана жергиликтүү өз алдынча башкаруу боюнча комитети талкуу өткөрүп, Кыргыз Республикасынын «Мамлекеттик жана муниципалдык кызматтар жөнүндө» мыйзамына өзгөртүүлөрдү киргизүү боюнча мыйзам долбоорун биринчи окууда жактырды.

Экономика жана соода министринин орун басары Чоро Сейитов бул мыйзам долбоору мамлекеттик жана муниципалдык кызматтарды көрсөтүү системасын жакшыртууга багытталганын белгиледи. Анын ичинде, ар бир кызмат үчүн административдик регламентти бекитүү талабын жоюу сунушталууда.

Талкуу учурунда депутат Карим Ханджеза бул норманын тууралыгына күмөн санап, административдик регламенттерди жоюу элге көрсөтүлгөн кызматтардын сапатына кандай таасир этерин сурады.

Министрдин орун басары регламенттерди жоюу мамлекеттик жана жергиликтүү бийлик органдарынын ресурстарын натыйжалуу пайдаланууга жардам берерин, ошол эле учурда кызматтардын сапатын начарлатпастан ишке ашырарын жооп берди.