Минстрой: Чолпон-Атада канализация тазалоо курулушу активдүү жүрүп жатат

Кыргызстан Республикасынын курулуш, архитектура жана турак-жай-коммуналдык чарба министри Нурдан Орунтаев Чолпон-Ата шаарындагы канализациялык суу тазалоо курулушунун жүрүшү менен таанышып чыкты.

Проект «Иссык-Куль көлүн экологиялык башкаруу жана туризмди туруктуу өнүктүрүү» инициативасынын алкагында ишке ашырылууда, деп билдирет Минстрой.

Министр негизги курулуш элементтеринен баштап, курулуп жаткан насостук станцияларга чейин объектти карап чыгып, мөөнөттөрдү так сактоо жана аткарылып жаткан иштердин жогорку сапатын камсыздоо зарылдыгын белгиледи.

Курулуш 2025-жылдын июль айында башталган жана “China Road” жана “Алкаташ” компаниялары тарабынан жүргүзүлүүдө. Проект боюнча, объектте күнүнө 14,2 миң кубометр кубаттуулуктагы жаңы канализациялык тазалоо станциясын куруу үчүн арматуралык иштер жүргүзүлүүдө. 12 насостук станция боюнча жер жумуштары толугу менен аякталды жана курулуш кийинки этапка өттү.

Проектти ишке ашыргандан кийин Чолпон-Ата шаары, Бостери, Бактуу-Долоноту жана Кара-Ой айылдары, ошондой эле алардын аймагында жайгашкан бардык пансионаттар, конок үйлөр жана башка объекттер борборлоштурулган канализация системасына 100% туташтырылат. Учурда Чолпон-Ата калкынын болгону 30–40% канализация системасына туташтырылган.

Курулуш иштерин 2027-жылдын аягына чейин аяктоо пландалууда.