Кыргыз Республикасынын саламаттык сактоо министри Каныбек Досмамбетов Бишкектеги тез жардам клиникалык ооруканасына барып, карылар үйүндөгү өрттөн жабыркагандардын абалын баалады.
Ооруканага 14 жабырлануучу келип түштү: 13 адам көмүр кычкыл газынан уулануу диагнозу менен жана бирөө биринчи даражада күйүк менен. Төрт пациенттин абалы орто оор, экөө оор, сегизинин абалы канааттандырарлык деп бааланууда. Абалдын оорлугу кошумча оорулардын болушу жана уулануунун кесепеттери менен байланыштуу.
Каныбек Досмамбетов жабырлануучулардын дарылоо жана ооруканага жаткырылышы боюнча шарттар менен таанышып, зарыл медициналык жардамды камсыздоо боюнча көрсөтмөлөр берди.
Өрт Бишкектеги карылар үйүнүн паллиативдик бөлүмүнүн палатасында болуп, 30 чарчы метрден ашык аянтты каптады.
Өрт өчүрүүчүлөр окуя болгон жерге 9 мүнөттө жетишти. Объекттин мүнөзүнө байланыштуу өрттү өчүрүүгө төрт единица өрт өчүрүү техникасы жана тез жардам бригадалары тартылды.
Окуя болгон жерге Бишкектин мэри Айбек Джунушалиев, Министрлер Кабинетинин орун басары Эдиль Байсалов жана Эмгек, социалдык камсыздоо жана миграция министри Канат Сагынбаев да келишти.
Окуянын натыйжасында оор абалда болгон эки паллиативдик пациент көз жумду. Жана дагы 11 адам көмүр кычкыл газынан уулануу мүмкүнчүлүгүн текшерүү үчүн медициналык мекемелерге жеткирилди.
Эскерте кетсек, 2025-жылдын июль айында мекемеде өрт тактикалык машыгуулар өткөрүлгөн жана бардык өрт коопсуздугу нормалары сакталган.
Карылар үйүнүн негизги имараты жабыркаган жок, өрт тек гана паллиативдик бөлүмдүн бир палатасын каптады. Эвакуация зарылчылык болсо жүргүзүлөт.
Шаар мэри Айбек Джунушалиев болгон окуянын жагдайларын аныктоо үчүн бардык документтерди текшерүүнү тапшырды.
Өрттүн себептери компетенттүү органдардын корутундуларынын негизинде аныкталат.
Вице-мэр Виктория Мозгачева билдиргендей, өрт карылар үйүнүн өзүнө эмес, көз карандысыз паллиативдик бөлүмдүн палатасында болгон. Учурда мекемеде 220 кызмат алуучу бар жана алар коопсуз, ошондуктан эвакуация маселеси туулбайт.
«Эркектердин паллиативдик бөлүмүндө 13 адам (оорулуу) болгон, алардын экөө көз жумду. Калган 11 адам башка бөлүмгө эвакуацияланды, бирок кийин көмүр кычкыл газынан уулануу тобокелдигин жоюу үчүн ооруканага жаткырылды. Эгер алардын абалы туруктуу болсо, эртең кайра кайтарып беришет», — деди Виктория Мозгачева.
Ал ошондой эле өткөн жылы мекемеде ӨКМ менен биргеликте өрт коопсуздугу боюнча машыгуулар өткөрүлгөнүн кошумчалады. «Эч кандай эскертүүлөр болгон жок, бардык иш-чаралар аткарылды. Учурда адистер палатада эмне болгонун аныктоодо», — деди вице-мэр.
Анын маалыматына караганда, 2025-жылы карылар үйүнүн үч кабаттуу имаратында капиталдык ремонт жүргүзүлгөн.
