Такировдун айтымында, бул чечим 2025-жылы Россия Федерациясынын өкмөтү тарабынан кабыл алынган. Ал ЕАЭБ өлкөлөрүндөгү товар агымдарын көзөмөлдөө жана мониторинг жүргүзүүнү күчөтүүгө багытталган.
«Бул система Союздун башка мамлекеттери тарабынан активдүү колдонулуп жатат. Россия биздин негизги соода өнөктөшү болгондуктан, бул системанын киргизилиши биздин экспортчуларга түздөн-түз таасир этерин түшүнүү маанилүү. СПОТ системасынын негизги талабы — жүк алуунучунун болушу», — деди ал.
Борбордун жетекчиси ошондой эле система 1-апрелден баштап пилоттук режимде иштей баштай турганын, ал эми толук ишке киргизүү 2026-жылдын 1-июлуна белгиленгенин кошумчалады.
«Экспортчулар жана жүк жөнөтүүчүлөр эки негизги аспектти эске алышы керек. Биринчиден, товарларды кабыл алгандыгын тастыктаган документтер болушу керек. Экинчиден, камсыздандыруу төлөмүн жүргүзүү зарыл. Бул үчүн форманы Россиянын Федералдык салык кызматынын системасынан табууга болот. Бул система боюнча катталган жүк алуунучу керектүү документти түзүп, камсыздандыруу суммасын төлөшү керек», — деп тактады Урмат Такиров.
Ал ошондой эле камсыздандыруу төлөмүнүн көлөмү электрондук эсеп-фактураларда көрсөтүлгөн НДС жана акциздердин негизинде аныкталарын жана Россиянын өнөктөшү тарабынан ФНС РФнын атайын эсепине төлөнүшү керек экенин түшүндүрдү.
«Товарды кабыл алуу боюнча документ даярдалып, төлөм жеткирүү алдында кеминде эки күн мурун жүргүзүлүшү керек. Эгер жүк Россияга QR-кодсуз жөнөтүлсө, төлөмдү жана жүк ташуу документин тастыктаган QR-кодсуз, мобилдик топтор аны чек арада токтотууга укуктуу. Биз ишкерлерге жаңы талаптарды аткаруу үчүн Россиядагы өнөктөштөрү менен бул маселелерди тереңирээк иштеп чыгууга кеңеш беребиз», — деп жыйынтыктады ал.
