Кыргызстанда күйүүчү-майлоочу материалдардын баалары туруктуу деңгээлде турат жана нефть продуктуларынын запастары жетиштүү. Бул тууралуу өлкөнүн Нефть трейдерлер ассоциациясынын президенти Канат Эшатов «Кабар» агенттигине берген интервьюсунда билдирди.
Анын айтымында, учурда Түштүк-Чыгыш Азиядагы кырдаал республикадагы нефть продуктуларынын баасына таасир эткен жок. Бирок, эгер эл аралык аренада кырдаал чыңалган бойдон калса, бул келечекте бааларга таасир этүүсү мүмкүн. Учурда нефть компаниялары кадимки режимде иштеп жатышат.
Эшатов ошондой эле учурда жеткирүүлөр март айында түзүлгөн келишимдер боюнча жүргүзүлүп жатканын, негизги бөлүгү ГСМ Россиядан келип жатканын белгиледи.
«Биз кырдаалды жакындан көзөмөлдөп, Лондон жана Нью-Йорк биржаларындагы бааларды байкап жатабыз. Учурда Brent маркасындагы нефтьтин баасы 79 долларга жетти, бирок биздин компаниялар азырынча ушул баада келишимдерди түзүшкөн жок. Баалардын белгилениши ар жума же он күн сайын нефть кайра иштетүү заводдору менен болгон келишимдерге жараша болот. Март айындагы мурда макулдашылган келишимдер боюнча жеткирүүлөр жүрүп жаткандыктан, биз баалардын туруктуулугун байкап жатабыз. Биз жыл сайын Суу ресурстары, айыл чарба жана кайра иштетүү өнөр жайы министрлиги менен меморандумга кол коебуз, жана көктөмдөгү талаа иштерине ГСМ запастары жетиштүү», - деп белгиледи ал.
