Жогорку Кенештин өнөр жай саясаты, транспорт, отун-энергетикалык комплекс, архитектура жана курулуш боюнча комитетинин жыйынында энергетика министри Таалайбек Ибраев Кыргызстандагы жаңылануучу энергия булактары (ЖЭБ) боюнча долбоорлордун ишке ашырылышы тууралуу маалымат берди.
Министрдин айтымында, учурда жалпы кубаттуулугу 650 МВт болгон шамал жана күн электр станцияларын куруу боюнча 13 инвестициялык келишимге кол коюлган, ошондой эле бир нече ири демилгелер активдүү өнүгүү стадиясында турат.
Ал ошондой эле, Чүй облусунун Кемин районунда 2025-жылдын 24-декабрына чейин 100 МВт кубаттуулуктагы электр станциясын пайдаланууга берүү пландалып жатканын билдирди. Вьетнамдык компания 2116 гектар жерге 1900 МВт кубаттуулуктагы күн станциясын курууга киришти. Мындан тышкары, «Юнигрин» компаниясы 2026-жылы кошумча 300 МВт кубаттуулуктагы станцияны пайдаланууга берүүнү пландаштырууда, ал эми «Росатом» тарабынан 100 МВт кубаттуулуктагы шамал станциясы да ишке киргизүүгө даярдалып жатат», - деп белгиледи Ибраев.
Министр бардык ушул долбоорлор ЖЭБ боюнча өлкөнүн энергетикалык секторун диверсификациялоодо, энергияны натыйжалуу пайдаланууда жана Кыргызстанда экологиялык таза электр энергиясын өндүрүүгө көмөктөшүүдө маанилүү роль ойнорун баса белгиледи.
