Министрлер кабинетинин алдындагы Мамлекеттик жер ресурстары, кадастр, геодезия жана картография агенттигинин орун басары Жакшылык Токтосунов аталган долбоор боюнча маалымат берди.
Токтосуновдун айтымында, мыйзам долбоорун иштеп чыгуунун негизги максаты — Мейкиндик маалыматтардын улуттук инфраструктурасын түзүү жана өнүктүрүү программасынын алкагында геодезиялык жана картографиялык ишмердүүлүк үчүн мыйзамдык базаны жакшыртуу.
Мыйзамдын жаңы редакциясында эски жоболор алмаштырылып, «мейкиндик маалыматтар», «геодезиялык негиз», «навигациялык системалар» сыяктуу терминдер такталат, ошондой эле геодезиялык жана картографиялык материалдарды түзүү, жаңыртуу жана пайдалануу боюнча талаптар белгиленет. Мыйзам долбоору ГЛОНАСС/GPS жана башка системалардагы ишмердүүлүктү жөнгө салып, мамлекеттик геодезиялык маалыматтарга кирүү тартибин аныктайт.
Мыйзам долбоорунун негизги багыты — геодезия жана картографияны санариптештирүү, мейкиндик маалыматтардын бирдиктүү базасын түзүү, бизнес жана мамлекеттик органдар үчүн процедураларды жеңилдетүү, ошондой эле ЕАЭБ жана БУУнун мейкиндик маалыматтар инфраструктурасына байланыштуу талаптарына ылайык келүү.
