Учурда депутаттар «Электр энергиясы жөнүндө» мыйзамга өзгөртүүлөрдү карашууда, алар электр жана жылуулук станциялары үчүн чектүү кубаттуулукту 30 мегаваттан 50 мегаватка чейин жогорулатуу сунушталууда. Орун басар министр бул мыйзам долбоорунун кабыл алынышы өлкөдө электр станцияларын курууга кызыккан инвесторлор үчүн мүмкүнчүлүктөрдү түзөөрүн белгиледи, анткени бул салык жана бажы преференцияларын пайдаланууга мүмкүндүк берет.
Депутаттардын суроолоруна Насипбек Каримов жооп берип, гидроэлектр станциялары Кыргызстанда электр энергиясынын 95% дан ашыгын камсыздай турганын айтты. Ал ошондой эле Энергетика министрлиги альтернативдүү энергия булактарын өнүктүрүү боюнча активдүү иш алып барууда деп кошумчалады.
«Өткөн жылдын декабрь айында 100 мегаватт кубаттуулуктагы күн станциясы ишке киргизилди. Энергетика министрлиги күн генерациясы тармагында 12 инвестор менен келишимдерге ээ. Анын ичинде ОсОО «Бишкек Солар» менен 300 мегаватт кубаттуулуктагы инвестициялык келишим түзүлгөн, жана 2026-жылы 100 мегаватт ишке киргизилет деп күтүлүүдө», — деди орун басар министр.
Анын айтымында, күн энергия станциясын куруу менен алектенген башка инвестор менен келишимдин алкагында 1900 мегаватт кубаттуулуктагы станциянын 150 мегаватт кубаттуулугун 2026-жылдын майына чейин ишке киргизүү пландалууда, ал эми жылдын аягына чейин дагы 450 мегаватт ишке киргизилет.
Мындан тышкары, быйыл дагы бир инвестор 400 мегаватт кубаттуулуктагы күн энергия станциясын курууга киришет.
Депутаттар талкуунун жыйынтыгында мыйзам долбоорун биринчи окууда жактырды.
