ОсОО «СК Эверест Групп» компаниясына таандык объектте долбоордук өзгөртүүлөр жүргүзүлгөн эмес жана курулуш иштеринин зарыл уруксатсыз жүргүзүлүп жатканы аныкталды.
Курулуш Бишкектеги Суванбердиева көчөсүндө, 33-үйдө жайгашкан, 16 кабаттуу турак үйдү соода жайлары жана эки деңгээлдүү жер астындагы токтотуучу жай менен куруу иштери жүрүп жатат.
Текшерүүнүн натыйжасында ОсОО «СК Эверест Групп» боюнча акт түзүлүп, буйрук берилди. Курулуш компаниясына аныкталган мыйзам бузуулардын жоюлушу үчүн белгиленген мөөнөттө зарыл документтерди сунуштоо тапшырылды. Ошондой эле 200 миң сом өлчөмүндө айып пул салынды.
Министрликтин маалыматына ылайык, учурда курулуш компаниясы Бишкек шаардык мамлекеттик архитектуралык-курулуш инспекциясына бекитилген долбоор жана мамлекеттик экспертизанын оң жыйынтыгын бербеген.
«Компания уруксат берүүчү документтерсиз курулуш жана монтаждоо иштерин жүргүзгөнүн, анын ичинде узундугу 40 метр жана туурасы 25 метр болгон диафрагманы, ошондой эле колонналарды орнотуп койгонун белгилеп кетүү маанилүү. Бул аракеттер Кыргыз Республикасынын «Курулуш жана архитектура жөнүндө» мыйзамын бузат», - деп баса белгилешти министрликтен.
Учурда иштин материалдары Октябрь райондук сотуна жөнөтүлдү, азыркы учурда соттук териштирүү жүрүп жатат.
Кыргыз Республикасынын Юстиция министрлигинин маалыматына ылайык, ОсОО «Курулуш компаниясы «Эверест Групп» 2024-жылы катталган. Компаниянын негиздөөчүсү жана жетекчиси Даниярбек уулу Улан.
