13-февралда Ташкентте Өзбекстан, Кыргызстан, Казакстан жана Тажикстан энергетика жана суу чарба министрлеринин жумушчу жыйыны өттү. Бул тууралуу Кыргыз Республикасынын Энергетика министрлигинин билдирүүсүндө айтылды.
Жыйында Кыргызстандын энергетика министри Таалайбек Ибраевден тышкары, Өзбекстан, Казакстан жана Тажикстан министрлери, ошондой эле бул өлкөлөрдүн энергетикалык компанияларынын өкүлдөрү катышты.
Переговорлордо акыркы жылдары мамлекет башчылары тарабынан башталган көп тараптуу кызматташтыктын бардык тармактарда, анын ичинде отун-энергетика тармагында ылдам жана ийгиликтүү өнүгүп жатканына көңүл бурулду.
Мындан тышкары, жыйындын катышуучулары күз-кыш мезгилин коопсуз өткөрүү, вегетация мезгилинде суу-энергетикалык системалардын туруктуу иштешин камсыз кылуу, ошондой эле өз ара кызматташтыкты тереңдетүү маселелерин талкуулашты. Тараптар тармактардын иш режимдеринин графиктерин макулдашышты.
