Жыйналыштын маалыматына ылайык, жалпы объектилердин 110ы капиталдык курулуш процессинде, ал эми 33 объект капиталдык ремонт жана реконструкциядан өтүүдө. 2025-жылы 19 социалдык объектти пайдаланууга берүү пландалууда, алардын арасында 8 мектеп, 4 бала бакча, 2 спорт залы жана 1 оорукананын курулушу бар. Мындан тышкары, 3 мектептин капиталдык ремонту жана 1 спорт комплексинин курулушу аяктады. Учурда 27 мектепте жана 1 бала бакчада ремонттук иштер улантылууда.
«100 өнөр жай ишканасы» демилгеси алкагында регионго 743 миллион 336 миң сом инвестиция тартылды, бул 12 жаңы өндүрүш ишканасын ачууга мүмкүндүк берди. Өндүрүш, кайра иштетүү жана кызмат көрсөтүү тармагында 134 кичи жана орто ишканалар түзүлүп, 1208 жумушчу орун пайда болду.
Мындан тышкары, Нарын облусунда Кытай–Кыргызстан–Узбекистан темир жолу, «Куланак» ГЭСи, ошондой эле ар бири 1 МВт кубаттуулуктагы эки чакан ГЭСти ишке ашыруу боюнча маанилүү долбоорлор активдүү жүзөгө ашырылууда — бири Ат-Башы районунун Ак-Муз айылдык округундагы Кичи-Ача участогунда, экинчиси Ак-Тала районунун Тоголок-Молдо айылдык аймагында жайгашкан.
