Курулуш министрлиги, бул компаниядан турак жай сатып алган кардарлар төрт жыл мурун инвестицияларын жасаганын, азыркыга чейин батирлерин ала электигин эске салды.
Мурда министрлик компанияга курулушту кайра баштоо боюнча бир нече эскертүү жана милдеттүү буйрук жөнөттү. Бирок, каржылык кыйынчылыктардан улам үлүш ээлеринин каражаттары натыйжалуу пайдаланылган жок, бул иштердин токтоп калуусуна алып келди.
Мамлекеттик органдар ОсОО «Доолот курулуштун» активдерин алышат
Учурда компаниянын жетекчилиги курулуш аянттарын курулуш иштерин аяктоо үчүн Курулуш министрлигине өткөрүп берди.
Министр Орунтаев реформалардын алкагында компаниянын активдери мамлекетке өткөрүлүп бериле турганын, курулуш иштерин этап-этабы менен кайра баштоо пландалып жатканын белгиледи.
«Кудайберген» жана «Шопоков» турак жай комплексинин курулушун аяктоо кийинки эки жылдын ичинде пландалууда.
Учурда токтоп калган иштерди бир айдын ичинде кайра баштоо үчүн чаралар көрүлүп, бардык тиешелүү документтер жана келишимдер кайра каралууда.
«Батирлердин баасы рыноктук шарттарда калат. Биз курулуштун так графигин жана материалдардын баасын иштеп чыгабыз. Үлүш ээлеринин каражаттары курулуш иштерин аяктоого гана пайдаланылат», – деп кошумчалады Нурдан Орунтаев.
Ар бир үлүш ээси менен келишимдер кайрадан адистер тарабынан талданып, келечектеги төлөмдөр жаңыланган график боюнча жүргүзүлөт.
Юстиция министрлигинин маалыматына ылайык, ОсОО «Доолот курулуш» 2016-жылы катталган. Оморов Бакай Акматкулович компаниянын жетекчиси, ал эми негиздөөчүсү Молдокунов Кудайберди Жеңишбекович.
