Ош облусунун Араван районундагы Тоо-Моюн айылдык аймагында жайгашкан Сары-Таш айылында 200 гектар жерге 105 МВт кубаттуулуктагы күн электр станциясынын курулушу башталат.
Бүгүн, Араван районундагы жумушчу сапарынын алкагында, Ош облусунун башчысы Аманкан Кенжебаев долбоор үчүн бөлүнгөн жер тилкеси менен таанышып, тиешелүү адистерден маалымат алды.
Долбоор чет элдик инвесторлор тарабынан каржыланат жана анын жалпы аткаруу наркы $65 млнды түзөт.
Курулуштун биринчи этабы жазында башталып, 15 МВттан ашык кубаттуулуктагы күн панелдерин орнотууну камтыйт. Иштин толук аякташы экинчи этапта пландаштырылууда, анда станциянын жалпы кубаттуулугу 105 МВтка жетет. Долбоордун алкагында болжол менен 450 миң күн панелин орнотуу пландалууда.
Мындан тышкары, долбоордун ишке ашуусунун натыйжасында 35 жергиликтүү тургун туруктуу жумуш орундарын алат. Облус башчысы инвесторлордун демилгесин толук колдоп, долбоорду ийгиликтүү ишке ашыруу үчүн ар тараптуу жардам көрсөтүүгө даяр экенин билдирди.
