Мамлекет башчынын алдындагы инвестицияларды тартуу боюнча улуттук агенттик жакында "Бишкек" эркин экономикалык зонасына келип, "Heli Sky" компаниясынын инвестициялык долбоорунун ишке ашырылышы менен таанышып чыкты. Агенттиктин басма сөз кызматы делегациянын визити учурунда Ми-8 жана Ми-171 вертолетторунун техникалык тейлөө борборунун өндүрүш мүмкүнчүлүктөрү көрсөтүлгөндүгүн, ошондой эле долбоордун учурдагы абалы жана келечектеги пландары тууралуу маалымат берилгенин билдирди.
Бул борбордун функционалын кеңейтүүгө чоң көңүл бурулду. Пландарга ылайык, 2026-жылы бул жерде Ми-171 вертолету үчүн авиациондук тренажер орнотулуп, интерактивдүү окуу классы ачылат. Бул жаңылык Кыргызстанда учкучтарды даярдоо жана кайра даярдоо мүмкүнчүлүгүн уюштурууга шарт түзөт, бул профилдик билим берүүнүн жеткиликтүүлүгүн жогорулатат жана чет өлкөлүк окуу жайларына болгон көз карандылыкты азайтат.
Инвестицияларды тартуу боюнча улуттук агенттиктин жетекчиси Равшанбек Сабиров бул долбоордун өлкөнүн экономикасы жана авиация сектору үчүн маанилүүлүгүн белгиледи.
"Бизге ниеттерди гана эмес, түзүлгөн кубаттуулуктар жана келечектеги так пландар түрүндөгү фактикалык натыйжаларды көрүү маанилүү. Бул долбоор Кыргызстанда заманбап авиациялык окуу жана кызмат көрсөтүү борборлорун түзүү мүмкүнчүлүгүн тастыктап жатат. Мындай демилгелер инвестицияларды тартууга, жумушчу орундарды түзүүгө, квалификациялуу адистерди даярдоого жана өлкөнүн технологиялык потенциалын күчөтүүгө жардам берет", - деди ал.
Визит учурунда агенттиктин өкүлдөрү ошондой эле регионалдык запастык бөлүктөрдүн инфраструктурасы менен таанышып, түзүлгөн өндүрүш-техникалык шарттарды баалашты.
Бул долбоордун ишке ашырылышы Кыргызстандагы авиация инфраструктурасын өнүктүрүү жана ушул тармакта заманбап кызмат көрсөтүү мүмкүнчүлүктөрүн түзүү үчүн маанилүү кадам катары каралууда.
