Кыргызстан Европалык Союздун мамлекеттерине мед экспорттоого расмий уруксат алды.
Агроөнөр жай министрлиги берген маалыматка ылайык, ушул себептен, ветеринария, мал чарбачылыгы, жайыттар жана азыктар кызматын жетектеген Адилет Сотовалдиев башында турган адистер өлкөнүн бардык мед өндүрүүчүлөрү менен жолугушуу өткөрүштү.
Жолугушууда экспорт үчүн жол картасын иштеп чыгуу, кыргыз мединин Европа рыногундагы атаандаштык жөндөмдүүлүгүн жогорулатуу, ошондой эле өндүрүлгөн продукциянын эл аралык сапат стандарттарына ылайык келүүсү боюнча маселелер талкууланды.
Европа комиссиясы Кыргызстандан мед экспорттоого уруксат берди жана бул продукцияны ЕСке импорттоо үчүн техникалык талаптарга ылайык келүүчү товарлардын тизмесине киргизди.
Европа рыногуна кирүү Кыргыз Республикасынын Суу ресурстары, айыл чарба жана кайра иштетүү өнөр жайы министрлигинин ветеринария кызматынын системалуу иши жана Европалык Союздун өнөктөштөрү менен биргеликте иш алып баруусунун натыйжасында мүмкүн болду.
Министрликте бул чечим жергиликтүү арачылар үчүн жаңы мүмкүнчүлүктөрдү ачып, экспорт көлөмүн көбөйтүүгө, продукциянын эл аралык аренада атаандаштык жөндөмдүүлүгүн жогорулатууга жана жаңы рынокторго чыгуу үчүн шарттарды түзүүгө жардам берет деп белгилешти.
Европа өлкөлөрүнө экспорттоого уруксат берилген мал чарба продукциясынын тизмесин кеңейтүү боюнча иштер улантылат, бул кыргыз өндүрүүчүлөргө Европа рыногундагы позицияларын бекемдөөгө мүмкүнчүлүк берет.
