Анын айтымында, «социалдык дүкөндөр кайра сатуу максатында сатып алуулар үчүн арналган эмес. Алар түздөн-түз калк менен иштешет жана сатып алуучуларынын эсебин жүргүзүшөт».
Иманкулов ошондой эле мындай дүкөндөрдө бир адамдын сатып ала турган товарларынын санына чектөөлөр бар экенин белгиледи.
«Социалдык дүкөндөрдө бир сатып алуучуга 10 килограммдан ашык товар сатып алууга уруксат берилбейт. Эгер товар жетишсиз болсо, норманы 5 килограммга чейин кыскартса болот. Бирок, кандай болсо да, 10 килограммдан ашык товар берилбейт», - деп кошумчалады ал.
Мындан тышкары, ал Бишкектеги «Заря» аймагындагы кырдаал тууралуу маалыматтын кылдат текшерилээрин билдирди.
«Бүгүнкү жыйналыштан кийин мен кеңешме өткөрүп, контролду күчөтүү боюнча конкреттүү көрсөтмөлөрдү берем. Эгер мындай көйгөйлөр чындап болсо, биз кесиптештер менен биргеликте зарыл чараларды көрөбүз», - деп белгиледи Иманкулов.
Ошондой эле, ал антимонополдук кызмат айыл чарба министрлиги жана жергиликтүү бийлик органдары менен кызматташып, жаңы социалдык дүкөндөрдү ачуу мүмкүнчүлүгүн карай турганын билдирди.
