2027-жылга чейин Кыргызстанда ломбарддардын уставдык капиталы 20 миллион сомго чейин көбөйтүлөт. Бул тууралуу «Кабар» агенттигиндеги «Элден Собол» программасында финансылык рынокту болжолдоо, көзөмөлдөө жана мониторингдөө бөлүмүнүн башкы адиси Суйоркул Ашимжан уулу билдирди.
Анын айтымында, капиталдын көлөмү этап-этабы менен жогорулайт. 2022-жылы аяктаган акыркы этапта капитал 1 миллион сомду түзгөн. 2025-жылдын 1-январынан тартып ломбарддардын минималдуу уставдык капиталы 3 миллион сомго жетиши керек.
Ашимжан уулу жакынкы жылдарда капиталдын дагы көбөйүшү күтүлүп жатканын белгиледи. 2026-жылдын 1-июлунан тартып ал 7 миллион сомдон кем болбошу керек, андан кийин 14 миллион сомго чейин көбөйтүлөт, 2027-жылы 20 миллион сомго жетет. Учурда тиешелүү долбоор үстүндө иш жүрүп жатат.
Ошондой эле ал ломбарддар жарандардан гана кыймылдуу мүлк кабыл ала аларын баса белгиледи. Учурдагы мыйзамга ылайык, ломбарддар турак жайларды жана жер участокторун кепилдик катары кабыл алууга укугу жок.
«Ломбарддар кыймылдуу мүлк, мисалы, унаалар, мобилдик телефондор жана алтындан жасалган буюмдарды гана кабыл ала алат, ошондой эле кыска мөөнөттүү насыяларды бере алат», - деп кошумчалады ал.
