Кыргызстандын борбору Бишкекте коммерциялык пайдалануу үчүн күн фотоэлектрдик станциясын жана электр энергиясын жыйноо системасын (BESS) камтыган жаңы пилоттук долбоордун презентациясы өттү. Бул долбоор Кыргыз Республикасынын Экономика жана коммерция министрлигинин колдоосу менен ишке ашырылды.
Министрликтен билдиришкендей, аталган объектте 50 киловаттка жакын кубаттуулуктагы күн электр станциясы жана 200 киловатт-сагаттык сыйымдылыктагы аккумулятордук система орнотулган. Мындан тышкары, энергияны пайдаланууну башкаруу үчүн санариптик система (PMS/EMS) киргизилген. Бардык технологиялык чечимдер корей жабдыктарына жана инженердик иштеп чыгууларга негизделген.
Система тармактык режимде (on-grid) иштей алат, бул керектөө чегин жумшартууга жана электр энергиясын оптималдаштырууга мүмкүндүк берет, ошондой эле автономдук режимде (off-grid) иштей алат, авариялык өчүрүүлөр учурунда электр энергиясын камсыздап, микротордун ишин колдоп турат.
Иш-чарада мамлекеттик органдардын, жеке сектордун, жогорку окуу жайларынын жана эл аралык уюмдардын өкүлдөрү катышты.
Экономика жана коммерция министрлигинде мындай долбоорлорду ишке ашыруу «жашыл» экономиканы өнүктүрүү, заманбап энергетикалык технологияларды киргизүү жана өлкөнүн энергетикалык инфраструктурасынын туруктуулугун жогорулатуу үчүн практикалык базаны түзүүдө маанилүү кадам экенин белгилешти.
