Лунанын көрүнүшү "Орион" космос кемесинен, NASAнын 6-апрелдеги видеосунан алынган кадр.
6-апрелде Artemis II миссиясынын астронавттары "Орион" космос кемеси менен Жерден 407 миң километр алыстап, жаңы рекорд орнотту, деп билдирет DW.
NASAнын X социалдык тармагындагы билдирүүсүнө ылайык, бул аралык "Аполлон-13" миссиясынын мурунку рекордунан 4 102 миляга (тактап айтканда, болжол менен 6 500 километрге) узун.
Ошол күнү "Орион" айдын гравитациясы Жердин гравитациясынан үстөмдүк кылган аймакка кирди. Ал учурда кеменин айга болгон аралыгы болжол менен 63 миң километр жана Жерге болгон аралыгы 232 миң километр болгон, деп билдиришти NASAнын өкүлдөрү.
"Орион" космос кемеси 1-апрелде Америка Кошмо Штаттарынын чыгыш жээгинен учуп чыкты. Экипаждын курамында NASAнын астронавттары Рид Уайсмен, Виктор Гловер жана Кристина Кук, ошондой эле Канадалык космос агенттигинин астронавты Джереми Хансен бар. Алар он күндүн ичинде айды айланып, кайра Жерге кайтууну пландаштырууда.
Экипаж аткарышы керек болгон тапшырмалардын арасында алты күн бою автономдуу дем алуу мүмкүнчүлүгүн камсыздай турган жаңы скафандрларды тестирлөө бар.
