Казакстандын Тышкы иштер министри Ермек Кошербаев Борбордук Азия жана Азербайжан өлкөлөрүнүн тышкы саясий ведомстволорунун башчылары менен телефон аркылуу сүйлөшүүлөрдү өткөрдү, деп билдирет өлкөнүн Тышкы иштер министрлигинин басма сөз кызматы. Бул сүйлөшүүгө Азербайжандын Джейхун Байрамов, Кыргызстандан Жээнбек Кулубаев, Тажикстандан Сироджиддин Мухриддин, Түркмөнстандан Рашид Мередов жана Өзбекстандан Бахтиёр Саидов катышты.
Министрлер талкуу учурунда Жакынкы Чыгыштагы учурдагы аскердик-саясий абал боюнча пикир алышып, кризис шартында жакын координация жана ыкчам өз ара аракеттенүүнүн маанилүүлүгүнө көңүл бурушту. Ермек Кошербаев Азербайжан жана Түркмөнстандагы кесиптештерине эвакуация маселелериндеги конструктивдүү кызматташтыгы үчүн ыраазычылык билдирди.
Сүйлөшүүлөрдүн катышуучулары абалды дипломатиялык жана саясий жолдор менен чечүүгө болгон берилгендиктерин растады. Алар чыңалууну азайтуунун, эл аралык нормаларды сактоонун жана регионалдык коопсуздукту, тынчтыкты жана туруктуулукту камсыздоо үчүн биргелешкен аракеттердин маанилүүлүгүн белгилешти.
Бардык тараптар жарандарды чыгаруу үчүн зарыл болгон жардамды көрсөтүүгө жана тышкы саясий ведомстволор ортосунда активдүү жумушчу байланыштарды улантууга даяр экендиктерин билдиришти.
