Иллюстративдик сүрөт
2-февралга карата Россиянын кол салуусунун натыйжасында Харьков, Сум, Днепропетровск жана Черкасск облустарындагы керектөөчүлөр үчүн электр энергиясы өчүрүлгөн.
Брифингде Некрасов белгилегендей, жабыркаган объекттердеги калыбына келтирүү иштеринин жүрүшү уланууда жана энергетикалык системанын туруктуу иштешин камсыз кылуу үчүн чаралар көрүлүүдө.
Мындан тышкары, 1-февралда орус аскерлери Днепропетровск облусунда энергетика тармагындагы кызматкерлерге кол салган. Дрондордун соккусу натыйжасында «Терновская» шахтасынын жанындагы энергетикалык ишканалардын кызматтык автобусы зыянга учурап, 16 шахтердун өмүрү кыйылып, 14 киши жаракат алган.
Энергетикалык системадагы критикалык кырдаалдан улам украин бийликтери авариялык электр энергиясын өчүрүүгө мажбур болушууда. Минэнерго өкүлү кырдаал нормалдашкан соң, керектөөчүлөр алдын ала пландалган графиктерге кайтып келе ала турганын кошумчалады.
Расмийдин айтымында, Одесса, Николаев жана Кировоград облустарында 160тан ашык айыл-кыштактар дагы жагымсыз аба ырайынын кесепетинен электр энергиясынан ажыратылган.
29-январда АКШнын президенти Дональд Трамп Владимир Путинге Киев жана башка украин шаарларын бир жума бою катуу суукка байланыштуу аткылабоо өтүнүчү менен кайрылганын билдирди. Кийинчерээк Кремль Трамптын мындай өтүнүчтү чын эле жасаганын, сүйлөшүүлөрдү жүргүзүү үчүн шарттарды түзүү максатында билдиргенин тастыктады. Украин бийликтери бул мезгилде, кеминде 29-январдан тартып, орус аскерлери энергетикалык инфраструктурага кол салууларын убактылуу токтотконун, бирок жарандык объекттерди аткылап жатканын белгилешти.
Москва, Киев жана Вашингтон ортосундагы жаңы сүйлөшүүлөр 1-февралда Абу-Дабиде өтөт деп күтүлгөн. Бирок жолугушуудан бир күн мурун Владимир Зеленский үч тараптуу сүйлөшүүлөр 4 жана 5-февралга жылдырылганын билдирди.
