Самбо Федерациясынан алынган маалыматка ылайык, бул мелдештердин жыйынтыгы менен улуттук курама команда түзүлөт. Турнир 18-февралга чейин уланат.
15-февралда конференциянын жыйыны өтүп, ага Жогорку Кеңештин спикери Марлен Маматалиев, самбо ардагерлери жана федерациянын өкүлдөрү катышты.
Марлен Маматалиев конференциянын катышуучуларын куттуктап, кыргыз самбочуларынын жетишкендиктерин белгилеп, алардын келечектеги ийгиликтерине үмүт артарын билдирди. Эмгек жүктөмүнүн көбөйүшүнө байланыштуу, ал Бишкек шаарындагы Самбо Федерациясынын жетекчилигин парламенттин депутаты жана эмгек сиңирген спорт чебери Жаныбек Аматовго өткөрүп берди. Конференциянын делегаттары Марлен Маматалиевди федерациянын ардактуу президенти болуп бир добуштан шайлашты.
Жаңы беш жылдык мөөнөттө Самбо Федерациясынын президенти Азиз Ибраев, башкы катчы Мирлан Акеров жана аткаруу комитетинин төрагасы Мурат Арыстанбеков кайра шайланды.
