Turmush агенттигинин кабарчысы менен болгон маегинде Нурлан 1989-жылдын 11-майында Караколдо төрөлгөнүн жана үй-бүлөсүндө үч баланын улуусу экенин бөлүштү. Ал К. Тыныстанов атындагы Ысык-Көл мамлекеттик университетинде «Математика жана инновациялык технологиялар» адистиги боюнча билим алып, математика жана информатика мугалими болуп иштөөгө мүмкүнчүлүк алды. М. Мамакеев атындагы мектепте Нурлан 13 жылдан бери жаңы муунду окутуп келет.
Бул эл аралык конкурс жыл сайын өткөрүлүп, билим берүү тармагында эң мыкты мугалимдерди аныктоого багытталган. Бул жылы финалдык этап 24-мартта Астанада өтүп, катышуучулар өзүнүн методикалык иштеп чыгуулары, кесиптик жетишкендиктери жана инновациялык окутуу ыкмаларын көрсөтүштү.
Жюри Нурлан Касымалиевдин заманбап технологияларды окутууга киргизүү аракеттерине жана окуучулардын билим сапатын жогорулатуудагы ролуна өзгөчө көңүл бурду.
Конкурстун жыйынтыгында ал I даражадагы диплом, «Эң мыкты мугалим — ТМД» статуэткасы, эмблема жана жетекчилик үчүн ыраазычылык катын алды.
«Конкурс 7-февралда башталды, ал эми биринчи турудун жыйынтыгы 12-февралда чыгарылды. Мен бул тууралуу социалдык тармактар аркылуу билдим жана күчүмдү сынап көрүүгө чечим кабыл алдым. Финалдык бөлүк 24-мартта Астанада өттү, жана мен мындай жогорку баа алганым үчүн кубанычтамын. Бул ийгилик менин аракеттеримден гана эмес, мектебибиздин жана бүт билим берүү системасынын жамааттык ишинен улам мүмкүн болду», - деди Нурлан Касымалиев.
Мурда Нурлан жергиликтүү бийликтен жана райондук билим берүү бөлүмүнөн бир нече сыйлыктар жана ыраазычылык каттарын алган.
Объектилер
Спутник
⛶
