Иш-чаралар Чолпонбай жана Кара-Буури айылдык аймактарында өтүп, анда райондун агрардык өнүктүрүү башкармалыгынын, ветеринардык кызматтын адистери, ошондой эле суу чарба башкармалыгынын жана Талас облусунун химиялаштыруу, өсүмдүктөрдү коргоо жана карантин боюнча башкармалыгынын өкүлдөрү катышты. "Айыл Банк" жана "Элдик Банк" кызматкерлери, ошондой эле айылдык аймактардын башчылары да катышты.
Жыйындарда жазгы талаа иштерин уюштуруу, сугат суусун эффективдүү пайдалануу жана айыл чарбасындагы колдоо чаралары боюнча сунуштар берилди.
Фермерлерге азык-түлүк өсүмдүктөрүн өстүрүүгө, азыраак суу талап кылган айыл чарба өсүмдүктөрүнө көңүл бурууга кеңеш берилди.
Суу чарба өкүлдөрү сугат суусун туура бөлүштүрүү, ирригациялык каналдардын тазалыгын сактоо жана суу ресурстарын рационалдуу пайдалануу зарылдыгына көңүл бурушту.
Ветеринарлар мал чарбачылыгын өнүктүрүү боюнча маалымат беришти, анын ичинде малдын тукумдук сапаттарын жакшыртуу үчүн жасалма уруктандыруу жана жаныбарлардын өндүрүмдүүлүгүн жогорулатуу мүмкүнчүлүктөрү жөнүндө. Мындан тышкары, малды базарларга чыгарууда инфекциялык оорулардын алдын алуу үчүн ветеринардык маалымкаттын болушу зарылдыгын эске салды.
Талас облусунун химиялаштыруу, өсүмдүктөрдү коргоо жана карантин боюнча башкармалыгынын адистери да зыянкечтерден жана оорулардан айыл чарба өсүмдүктөрүн коргоо боюнча кеңештерди беришти, сапаттуу үрөндөрдү пайдалануу жана агрономиялык талаптарды сактоо боюнча көңүл бурушту.
Иш-чаранын аягында фермерлер адистерге өз суроолорун берип, жоопторду алышты.
