Таласта Германиянын өнүктүрүү банкы тарабынан берилген гранттык каражаттардын эсебинен жаңы перинаталдык борбордун курулушу башталды. Бул тууралуу Жогорку Кеңештин жыйынында саламаттык сактоо министринин биринчи орун басары Тилек Мамадалиев маалымдады.
Анын айтымында, борбор заманбап медициналык жабдуулар менен жабдылат жана курулушу 2027-жылдын башына чейин аякталат деп пландалууда. Ошондой эле Кыргызстандык дарыгерлерди Германияда окутуу каралган.
Мындан тышкары, Талас облусунда республикалык бюджеттен каржыланган дагы эки медициналык объекттин курулушу пландалууда. Бул жылы Талас районундагы Копуро-Базар айылында 25 орундуу оорукананын курулушу башталат. Бакай-Ата районунда 100 орундуу жалпы дарыгердик практика борборун түзүү да пландалууда.
