Бишкек–Нарын–Торугарт жолунун 297ден 305 кмге чейинки бөлүгүндө кар жана кар көчкүндөрүн жоюу боюнча иштер аяктады. Бул тууралуу Транспорт жана байланыш министрлигинин басма сөз кызматы маалымдады.
Учурда транспорттун кыймылы калыбына келтирилди, унаалар эки тарапка да жүрө алышат. Бирок, министрлик белгилегендей, бул бөлүктө кар көчкү түшүү коркунучу бар. Кыйын кырдаалдар пайда болгондо, жол кызматтары даярдыкта болуп, тез арада жооп берүү үчүн бардык зарыл жабдыктарга ээ.
Министрлик ошондой эле айдоочуларга жана жүргүнчүлөргө сак болууну, жол кырдаалын кылдат байкоону жана жол кыймылынын эрежелерин катуу сактоону сунуштайт.
