Лондондо «Ортолук Азия-Улуу Британия» форматында жолугушуу өттү
Кыргыз Республикасынын тышкы иштер министри Жээнбек Кулубаев Лондондо «Ортолук Азия – Улуу Британия» форматынын алкагында өткөн министрлер жолугушуусуна катышты, деп билдирди тышкы саясат ведомствосунун басма сөз кызматы.
Бул иш-чарада Казакстан, Тажикстан, Түркмөнстан, Өзбекстандан келген кесиптештер, ошондой эле Улуу Британиянын тышкы иштер боюнча мамлекеттик катчысы да катышты.
Кулубаев өз сөзүндө Ортолук Азиянын Азия менен Европа ортосундагы маанилүү геополитикалык орунду ээлеп, олуттуу энергетикалык ресурстарга, чоң адамдык потенциалга жана кенен транзиттик мүмкүнчүлүктөргө ээ экенин белгиледи.
Министр Улуу Британиянын бир тараптуу санкцияларынын Ортолук Азия өлкөлөрүнүн бул өлкө менен соода-экономикалык жана финансылык байланыштарына тийгизген таасирине кабатырлануусун билдирди.
Мындан тышкары, Кыргызстан эл аралык экономикалык мамилелерди саясий максатта пайдаланууга каршы экенин жана өз ара пайдалуу чечимдерди табуу үчүн ачык жана конструктивдүү диалогго даяр экенин баса белгиледи.
