Афганистан согушу 1979-жылдан 1989-жылга чейин созулду, жана 35 жылдан кийин ардагерлер өздөрүнүн согушта курман болгон досторун эстешет. Кыргызстандан бул конфликтке 7000ден ашык аскер кызматкери катышып, алардын 300ү курман болуп, болжол менен 1500ү жаракат алды, 4ү дайынсыз жоголду.
Turmushтун кабарчысы Ысык-Көл облусунда ардагерлер менен жолугуп, алардын окуяларын угуп көрдү.
Батырбек Элебесов, 1961-жылы Түп районунун Кен-Суу айылында төрөлгөн, 1980-жылдан баштап Афганистанда 1 жыл 9 ай кызмат кылган. Ал мындай дейт: «Биз кызматка буйрук боюнча чакырылдык. Повест алгандан кийин эки айлык даярдык курсун өттүм жана жакында эле согуштун башында Афганистанда болдум. Биз электр жарыгы жок чатырларда жашадык, май лампаларын колдондук. Көптөгөн досторум жаракат алды, кээ бирлери курман болду. Мен туулган жеримде мындай согуштар болбосун, жаштар биздин баштан өткөргөн ужастарды көрбөсүн деп үмүттөнөм», - деп бөлүшөт ардагер.
Чолпон Исмаилов Боз-Бешик айылында төрөлүп, 1980-жылы армияга чакырылган. Ал Афганистанда маанилүү жүк ташууда катышып, төрт баланы тарбиялады. «Мен болжол менен бир жыл кызмат кылып, аскерлер үчүн ок-дарылар жана азык-түлүк жеткирип жүрдүм. Биз колонна менен жүрдүк, алдыбызда танктар жана БТРлер бар эле. Мен бул ташуулар учурунда үч жолу жол кырсыгына туш болдум, бирок, кудайга шүгүр, тирүү калдым. Ар дайым тынчтык болсун», - деди ал.
Жолдошбек Калиев, 1959-жылы Тон районунун Ак-Олон айылында төрөлгөн, согуштун эң алгачкы жылдарында кызмат кылган. Ал 1978-жылдын майында чакырылган жана Түркестан аскердик округунда кызмат кылган. Афганистанда 1979-жылдын 25-декабрынан баштап болгон. «Согуш кыйын башталды. Биз жаш болчубуз, жана мекен үчүн кызмат кылып жатабыз деп ойлосок да, чындыгында көп коркуу жана стрессти баштан өткөрдүк. Мен 18 жашымда кызматка кетип, 20 жашымда кайтып келдим. Бул эскерүүлөр азыр жомоктой сезилет», - дейт ал.
Сталбек Казиев Тажикстандагы жарандык согуш учурунда тынчтык орнотуучу болгон. «1992-жылы биз Тажикстанга тынчтык орнотуу үчүн жөнөдүк. Бизге болгону 18 жаш эле. Ал согушта 100 миңден ашык адам курман болду жана ал 8 жылга созулду. Биз ден соолугубузду жоготуп, көп кыйынчылыктарды баштан өткөрдүк. Президент биздин статусубузду калыбына келтирди, эми 25-февраль Тажик-афган согушунун катышуучуларынын эскерүү күнү катары белгиленет», - деп кошумчалады ал.
