Суйумбаев атындагы стадион өткөн жылы капиталдык оңдоодон өткөн: чыгыш тарабындагы, түндүк жана түштүк трибуналардын чатыры жабылган, ал эми жеңил атлетика жолуна эл аралык стандарттарга ылайык резина төшөлгөн.
Ишти ОсОО «Универсал» аткарган. Заказчы Ош шаарынын мэриясынын капиталдык курулуш башкармалыгы болгон.
Стадионду куруу боюнча техникалык көзөмөлдү жүргүзгөн УКСтин жетекчиси Эркин Эргешов Turmushка берген комментарийинде, аталган бетон элементтер колонналардын астында узак убакыт кызмат кылуусу үчүн куюлганын, бирок алардын бузулушу конструкцияга таасир этпей турганын билдирди. «Стадиондун чатырына кармап турган айрым колонналар жөнүндө сөз болуп жатат. Биз колонналардын астына бетон куйганбыз, алар узак убакыт кызмат кылсын деп. Бирок бул бетондун бузулушу конструкцияга таасир этпейт, анткени колонналардын негизги бөлүгү абдан бекем. Жалпысынан, алар узак убакытка чыдашы үчүн бетонду мезгил-мезгили менен жаңыртып же боёп туруу керек. Биз азыр аны штукатурка кылып, боёп беребиз», - деди ал.
Ал колонналардын негизин башында болжол менен 2 метр тереңдикте казып, бетон куюп, андан кийин колонналарды орнотууну белгиледи.
Ош шаардык спорт комитетинин имаратынын сол тарабындагы тосмодо да бетон бөлүктөрү бузулуп баштаган. Комитеттин кызматкери Фарух Сыдыковдун маалыматы боюнча, тосмо мурдагы жетекчилик тарабынан орнотулган.
«Сол тараптагы участок жеке менчикке таандык. Эгерде ээлери ал жакта курулуш баштабасын деп, мурдагы жетекчилик аймакты тосуп койгон. Кийин стадиондун колонналарын орнотууда жер казуу иштерин жүргүзгөндө, топурак жана таштар ошол тарапка төгүлгөн, ошондуктан бетон тосмо жабыркаган. Ички жагы жакшы абалда, ал эми сырты — ушундай болуп калды», - деди Сыдыков.
Анын айтымында, учурда аталган тосмону оңдоо боюнча чаралар көрүлүүдө.
