Өкмөттүн басма сөз кызматынын маалыматына ылайык, жаңы борбордо инновациялык музейлер, боулинг, кинотеатрлар, ошондой эле балдардын интеллектуалдык жана чыгармачылык өнүгүүсүнө жардам берүүчү ар кандай лабиринттер жана зоналар жайгашат.
Проектте беш-алты роботту киргизүүгө өзгөчө көңүл бурулат, алар жасалма интеллект менен жабдылат. Учурда бул маселе боюнча кытайлык өнөктөштөр менен сүйлөшүүлөр жүргүзүлүүдө. Келечекте бул роботтор кыргыз тилинде маалымат берип, гид катары иштей алышат.
Учурда кышкы шарттарга карабастан, курулушта 115 адам иштеп жатат. Ишти мамлекеттик «Кыргызкурулуш» ишканасы жүргүзүүдө.
Максат Байжигитовдун айтымында, Талас облусундагы бардык маанилүү курулуш долбоорлору 31-августка чейин, Кыргызстандын көз карандысыздыгы күнүнө чейин аяктайт. Бул күн 2026-жылы Таласта республикалык деңгээлде белгиленет.
Жаңы эс алуу борбору Талас шаары, Шамбетова көчөсү, № 70 дарегинде жайгашат. Анын жалпы аянты 17 миң чарчы метрди түзөт. Долбоор президенттин Талас облусундагы өкүлү Эрмат Жумаевдин демилгеси менен жана президент Садыр Жапаровдун колдоосу менен ишке ашырылууда.
