Кыргыз Республикасынын Эмгек, социалдык камсыздоо жана миграция министри Канат Сагынбаев Нарын облусуна болгон жумушчу сапарынын алкагында беш кичинекей баланы тарбиялап жаткан Медина А. аттуу үй-бүлөнү зыярат кылды. Алар кыйын жашоо шартында турушат.
Министрликтин маалымат кызматынын маалыматы боюнча, учурда үй-бүлөнүн эч бир мүчөсү иштебейт. Балдар дагы кичинекей, ал эми атасы ден соолугунун абалына байланыштуу убактылуу иштей албай жатат. Визит учурунда министр алардын жашоо шарттарын баалап, ата-энелер менен жана жергиликтүү социалдык коргоо органдарынын өкүлдөрү менен сүйлөшүү жүргүздү.
Визиттен кийин үй-бүлөгө «Үй-бүлөгө жардам» пособосун алууга жана үч жашка чейинки эки бала үчүн ай сайын берилүүчү БТК пособосун дайындоодо жардам көрсөтүлдү. Мындан тышкары, Нарын облусундагы президенттин ыйгарым укуктуу өкүлүнүн орун басары жергиликтүү администрациянын кышкы мезгилге отун менен жардам берерин тастыктады.
«Кыйын абалда калган үй-бүлөлөргө мамлекеттик колдоо көрсөтүү — биздин түз милдетибиз. Биздин максат — пособолорду убагында дайындап берүү гана эмес, ошондой эле мындай үй-бүлөлөрдү колдоп, аларды туруктуу жашоо деңгээлине чыгууга жана балдарына өсүү жана өнүгүү үчүн ылайыктуу шарттарды камсыз кылууга жардам берүү», - деп баса белгиледи Канат Сагынбаев.
