«Кыргыз Республика менен ОПЕКтин эл аралык өнүктүрүү фонду ортосундагы кредиттик келишимди ратификациялоо жөнүндө» мыйзам долбоору Жогорку Кенеш тарабынан үч окууда бекитилди. Келишим 2025-жылдын 23-сентябрында Бишкекте кол коюлган.
Суу ресурстары, айыл чарба жана кайра иштетүү өнөр жайы министринин орун басары Жаныбек Керималиевдин айтымында, долбоор Ош, Чүй жана Ысык-Көл облустарындагы 126 айылдын тургундарына коопсуз ичүүчү суу жана санитарияга жеткиликтүүлүктү жакшыртууга багытталган. Программанын жалпы каржылоо суммасы 200 миллион долларды түзөт, анын 20 миллиону ОПЕКтин эл аралык өнүктүрүү фонду тарабынан бөлүнөт. Кредит 20 жылдык мөөнөт менен 5 жылдык жеңилдетилген мөөнөт жана жылына 1,25% пайыздык ставкасымен берилет.
