Кыргыз Республикасынын президенти жана анын өкмөтү жеке секторго байланыштуу маселелерге көбүрөөк көңүл буруп, жеңилдиктер системасын киргизүүдө. Бул тууралуу Кыргызстандын альпинизм федерациясынын президенти Эдуард Кубатов «Кабар» агенттигинин подкастында билдирди.
Кубатов жеке сектордун өлкөнүн экономикалык өнүгүүсүндөгү ролу баалуу экенин белгилеп, анын активдүү катышуусуз экономикада прогресске жетүү мүмкүн эместигин айтты.
«Мурда жеке сектор кыйынчылыктарды башынан өткөрдү. Бирок акыркы жылдары кырдаалдын жакшырганы байкалууда: бизнес көбүрөөк угулууда, ал эми мамлекет ар түрдүү жеңилдиктерди сунуштоодо. Салык жана бажы тармактарында реформалар уланууда. Мамлекет ишкерлердин көйгөйлөрүн түшүнүп, салык системасына зарыл өзгөртүүлөрдү киргизүүдө. Мен азыркы реформалар мурдагы кемчиликтерди оңдоого багытталган жана бийликтин бизнести угууга даяр экенин көрсөтөт деп эсептейм», - деп баса белгиледи ал.
Мындан тышкары, Кубатов мамлекеттик ишканалар өз өнүгүүсүндө жаңы деңгээлге жеткенин жана алардын жетекчилери иште жогорку натыйжалуулук көрсөтүп жатканын белгиледи.
