Мода үйүнүн негиздөөчүсү Валентино Гаравани дүйнөдөн кайтты

93 жашында италиялык модельер жана дүйнөгө белгилүү Valentino мода үйүнүн негиздөөчүсү Валентино Гаравани дүйнөдөн кайтты, деп билдирет WWD басылмасы.
Архивден алынган сүрөт. Мода үйүнүн негиздөөчүсү Валентино Гаравани дүйнөдөн кайтты
Ал 19-январда Римдеги резиденциясында жакындарынын арасында көз жумду. Модельерди акыркы сапарга узатуу 21 жана 22-январда Миньянелли аянтында өтөт, ал эми жерге берүү жума күнү Санта-Мария-дельи-Анджели-э-дей-Мартири базиликасында пландалган.

Валентино Гаравани 1932-жылдын 11-майында Италиянын түндүгүндөгү Вогера шаарында төрөлгөн. 17 жашында ал Парижге көчүп, көркөм искусстволор мектебинде жана жогорку мода синдикатында билим алган. 1959-жылы Римге кайтып келип, Джанкарло Джамметти менен биргеликте 1960-жылы мода үйүн негиздеген.
Архивден алынган сүрөт. Кээ бир Valentino кийимдери дүйнө жүзү боюнча музейлерде көрсөтүлүп, көптөгөн белгилүү адамдар тарабынан кийилген
Чет элдик кардарларды тарткан биринчи ийгиликтүү коллекциянын көрсөтүлүшү 1962-жылы Флоренцияда өткөн. Алгачкы кардарларынын бири Жаклин Кеннеди болгон, ал 1964-жылы мурдагы АКШ президенти Джон Кеннединин өлүмүнө байланыштуу алты кийим сатып алган.

1998-жылы Валентино Гаравани жана анын шериги Джанкарло Джамметти Valentino брендин италиялык HdP конгломератына 300 миллион долларга сатышкан, ал эми 2002-жылы Marzotto Appareli компаниясы аны кайра сатып алган.

2007-жылы Гаравани Париждеги акыркы көрсөтүүсүнөн кийин мода дүйнөсүндөгү карьерасын жыйынтыктаганын жарыялады.

Анын кээ бир кийимдери дүйнө жүзү боюнча музейлерде көптөн бери көрсөтүлүп келет жана көптөгөн белгилүү адамдар тарабынан кийилүүдө.