Мамлекеттик жаштар театры «Учур» эми өзүнүн имаратына ээ болду. Бул тууралуу театрдын социалдык тармактардагы расмий аккаунттары аркылуу маалымдалды.
Маалыматка ылайык, жаңы имарат мурда жеке театр «Тунгучка» таандык болуп, эми «Учур» театрынын карамагына өткөрүлөт.
«25 жылдан бери иштеп келе жаткан, көптөгөн сыйлыктарды алган труппабыз менен биз кыргыз театралдык искусствосун эл аралык аренада кайрадан көрсөтө алабыз. Биздин кубанычыбыз чексиз!» - деп айтылат расмий билдирүүдө.
Эске салсак, ушул учурга чейин жаштар театры «Учур» өз спектаклдерин башка театрлардын сахналарында коюп, өзүнүн аянты жок болчу.
