Кыргызстандыктар бекер мөөнөтсүз айдоочулук күбөлүктөрүн алмаштыра алышат

Кыргызстандык жарандарга бир айдын ичинде мөөнөтсүз айдоочулук күбөлүктөрүн акысыз алмаштыруу мүмкүнчүлүгү берилди. Бул тууралуу президенттин иш башкаруучусу Каныбек Туманбаев социалдык тармактар аркылуу билдирди.

Анын айтымында, жарандардан айдоочулук күбөлүктөрү боюнча көптөгөн суроолор келип түшүүдө.

«Мен түшүндүрмө берүүнү чечтим. Президенттин буйругуна ылайык, 15-январдан 15-февралга чейин эски мөөнөтсүз күбөлүктөрдү жаңы документтерге акысыз алмаштырууга болот. Мүмкүнчүлүктү колдон чыгарбаңыз жана бул иш менен дароо алектениңиз», — деди Туманбаев.

Эскертүү керек, жаңы үлгүдөгү айдоочулук күбөлүктөр 2025-жылдын ноябрынан баштап берилет. Мөөнөтсүз күбөлүктөрдү жаңысына алмаштыруу Жол транспорт каражаттарын жана айдоочуларды каттоо мамлекеттик агенттигинде жүргүзүлөт.