Ал 40 жылдан ашык Ак-Талада жашады, андан кийин жашоо шарттарына байланыштуу шаарга көчүп кетти. Бүгүнкү күндө ал ар кандай көргөзмөлөргө жана маданий иш-чараларга активдүү катышууда.
Алмаздын кесиби — сүрөтчү. Ал Гапар Айтиев атындагы Кыргыз улуттук көркөм искусстволор музейинин системасындагы окуу жайын — Чуйков атындагы сүрөтчүлүк училищени аяктаган. Искусствого болгон кызыгуусу бала кезинен пайда болгон. Бул жолду тандап алууга анын улуу эжеси, белгилүү сүрөтчү Гулипа Кожогулова чоң таасир эткен. Ал эжесинин жанында жүрүп, көркөм искусствонун сырларын үйрөнүп, чыгармачылыктан шыктанган.
Алгач Кожогулов боёктор менен иштесе, кийинчерээк жиптерди колдонуп сүрөт тартуунун техникасын өздөштүрүп, өзгөчө стилин тапкан. Азыр ал жаңы техникаларды үйрөнүп, чыгармачылыгында жаңыланууга умтулууда.
Анын айтымында, сүрөтчү үчүн негизги талап — дайыма издөөдө болуу. «Жаңы нерселерди жаратуу — бул үзгүлтүксүз эмгек. Күн-түн иштеш керек», - деди Алмаз.
68 жаштагы сүрөтчү үйлөнгөн. Анын уулу жана эки кызы, ошондой эле неберелери бар. Ал ар кандай белгилүү адамдардын портреттерин жараткан: Владимир Путин, Алла Пугачёва, Филипп Киркоров. Айрыкча Путиндин портрети 5000 долларга бааланган жана Москвадагы ресторандын ээси тарабынан заказ боюнча сатылган.
Бүгүнкү күндө сүрөтчү заманбап технологиялардын, айрыкча жасалма интеллекттин өнүгүшүнө тынчсыздануу менен карап жатат.
Анын пикиринде, келечекте кол менен жасалган чыгармалардын орду кыскарышы мүмкүн, бул сүрөтчүлөр жана кол өнөрчүлөр үчүн кыйынчылыктарды жаратышы ыктымал.
«Азыр жасалма интеллект — абдан коркунучтуу нерсе. Убакыттын өтүшү менен сүрөтчүлөрдүн кол менен аткарган эмгектери жоголуп кетет деп корком. Биз кол менен жасалган нерселердин жоголуп кетишинен коркуу менен жашайбыз. Кол өнөрчүлөр да коркунучта. Мен да жумушсуз калабызбы деп корком. Союз кулаганда, биз бардык визуалдык такталарды жана жарнама материалдарын кол менен даярдаганбыз.
Компьютерлер пайда болгондо, көп нерсе өзгөрдү. Мурда бардык такталар жана визуалдык жарнама кол менен жасалчу. Азыр технологиялар баарын ээлеп алды. Бирок, биз дагы деле издөөдө жана иштөөнү улантуудабыз».
