Ал 2000-жылдын 24-июлунда Ысык-Көл облусунун Жети-Өгүз районундагы Ак-Кочкор айылында төрөлгөн. Азыркы учурда Түп районунун Түп айылында жашап, Абдыкасыма Карымшаков атындагы орто мектепте орус тили жана адабияты мугалими болуп иштейт. 2018-жылы К.Тыныстанов атындагы Ысык-Көл мамлекеттик университетинин филология факультетине кабыл алынып, 2022-жылы ийгиликтүү аяктаган. Азыркы учурда өз адистиги боюнча иштеп, окуучуларга сапаттуу билим берүүгө аракет кылууда.
«Мугалим кесибине болгон кызыгуум мектеп жылдарында пайда болгон. Жети-Өгүз районундагы Д.Иманов атындагы мектепте окуп жүргөндө, 5-класста класстын жетекчиси Алсеитова Нурзат Базарбековнанын таасири чоң болду. Ал мыкты мугалим эле, материалды оюн аркылуу түшүндүрүп, окуучулардын кызыгуусун арттыра алчу. Кейин, 10-11-класстарда орус тили жана адабияты сабактарын өтүп жаткан мугалимим Айнура Урманбетовага өзгөчө жакын болуп калдым.
Эсиңизде, бир өзгөчө окуя болду. 11-класстын аякташы боюнча линейкада мугалимдерге гүл тапшырууну сунуштаганда, ойлонбой эле Айнура эжеге гүл бердим. Ошол учурда ал мага батасын берди. Музыкадан эмне деп айтканын укпай калдым, бирок эсимде. Азыр артка карап, ошол батанын ишке ашкандыгына ишенем. Мүмкүн, ошол күн мени мугалим жолуна багыттагандыр.
Кесип тандоомдо ата-энемдин да чоң ролу болду. Алар мага орус тили мугалими кесиби ылайыктуу экенин айтып, туура кеңеш беришти», - деди Токтобекова.
Ал 2024-жылы эмгек жолун баштап, бүгүнкү күнгө чейин орус тили жана адабияты сабактарын өтүп келет.
«Азыр менин педагогикалык стажым 1 жыл 7 ай. Өз ишимде заманбап «5Е» методикасын колдонуп, окуучулардын кызыгуусун интерактивдүү методдор аркылуу арттырууга аракет кылам. Сабактарда интерактивдүү такта жана телевизор сыяктуу технологияларды колдонуп, оюн элементтерин да киргизем.
Ар бир күн мектепте өзгөчө жана кызыктуу өтөт. Бир жолу ачык сабакта 40 мүнөткө эсептелген материалды окуучулар абдан тез аткарышып, сабак 6 мүнөт эрте аяктады. Ошол учурда мен мугалимдердин алдында уялып калдым, жана кайра даярданып, бир жума өткөндөн кийин ачык сабак өткөрдүм. Бул да мен үчүн чоң тажрыйба болду», - деди Алия.
Азыр ал «Жылдын мугалими» сынагына даярданып жатат. Бул анын чоң максаттарынан бири.
«2024-2025-окуу жылында мектептин атынан «Кара кыргыз республикасы» темасындагы сынакка катышып, 2-орунду алдык. Мындан тышкары, инклюзивдик билим берүү боюнча курс өтүп, сертификат алдым.
Бош убактымды пайдалуу өткөрүүгө аракет кылам. Окуучуларым менен видео тартам жана социалдык тармактарда активдүү болом. Ошондой эле спортко кызыгам — волейбол ойнойм, шахмат жана тогуз коргоолду сүйөм. Мындан тышкары, мен үчүн үй-бүлөм менен убакыт өткөрүү абдан маанилүү», - деди Токтобекова.
2020-жылы турмушка чыгып, азыр жолдошу менен эки кыз жана бир уул тарбиялап жатат.
«Менин келечектеги негизги максатым — билимдүү, тарбиялуу, өз өлкөсүнө берилген, татыктуу адамдарды тарбиялоо. Окуучуларым элдин сыймыгы болуучу жаштарга айланса дейм. Ошондой эле, менин эң чоң максаттарымдын бири — «Жылдын мыкты мугалими» наамын алуу», - деди ал.
