Мыйзам долбоорунун негизги максаты сыйлык берүү системасын уюштуруу, анын актуалдуулугун жогорулатуу жана мамлекеттик сыйлыктардын статусун көтөрүү болуп саналат.
Документ жарандардын коомго жана мамлекетке көрсөткөн эмгектерин моралдык таанууну чагылдырган жогорку ардактуу наамдардын системасын түзүүнү, ошондой эле кайталанган нормаларды жоюп, сыйлыктардын коомдук маанисин жогорулатууга мүмкүндүк берет.
Учурдагы 46 түрдөгү мамлекеттик сыйлыктардан 18 гана сакталат, ошондой эле «Кыргыз Республикасынын жаратманы» — улуттук деңгээлде көрүнүктүү жаңычыл салым кошкон адамдар үчүн жана «Кыргыз Республикасынын сыймыгы» — улуттук сыймыктын символу болгон эрдиктер жана жетишкендиктери үчүн жаңы эки жогорку ардактуу наам киргизилет.
Парламенттин спикери Марлен Маматалиев келип түшкөн суроолор жана сунуштар боюнча талкуу үчүн атайын платформа түзүлгөнүн билдирди.
«Биз сунушталган маселелердин алкагында мурда көтөрүлгөн бардык маанилүү суроолорду эске алдык. Айрыкча, «Эл мугалими» наамы сакталат, ошондой эле «Эл дарыгери», «Эл артисти», «Эл жазуучусу», «Эл акыны», «Эл сүрөтчүсү» жана башка наамдар да калат», - деди ал.
Талкуунун жыйынтыгында депутаттар бул мыйзам долбоорун экинчи окууда бир добуштан колдошту.
