Депутат тоо аймактары үчүн электр энергиясын камсыздоо боюнча өзгөчө режимди киргизүүнү талап кылууда

Жогорку Кенештин жыйынында депутат Нурланбек Азыгалиев Кыргызстандагы жогорку тоолуу жана суук аймактарда электр энергиясын колдонууга атайын режим түзүүнү сунуштады.

Ал учурдагы электр энергиясын колдонууга коюлган чектөөлөр калк үчүн, өзгөчө тоолуу аймактарда, олуттуу көйгөйлөрдү жаратып жатканын белгиледи.

Нардептин айтымында, кыш мезгилинде Суусамыр өрөөнүндө температура −45-50 градуска чейин жетиши мүмкүн, жана мындай шарттарда электр энергиясы жөн гана ыңгайлуулук эмес, зарыл ресурс болуп калат. «3 киловатттык орнотулган лимит менен үйлөрдү, мектептерди жана социалдык мекемелерди жылытуу мүмкүн эмес. Адамдар жарык менен жылуулук арасында тандоо кылууга мажбур болушууда», — деди ал.

Мындан тышкары, Азыгалиев калк үчүн көмүрдүн жетишсиздигин, анын жеткирүүдөгы кыйынчылыктарды жана баалардын көтөрүлүшүн белгиледи. Парламентарий катуу отун менен камсыздоо маселеси мамлекеттин көңүлүн бурууну талап кылат, анткени бул техникалык гана эмес, социалдык, гуманитардык көйгөй. Сууктан улам кээ бир мектептер дистанциялык окутууга өтүүгө мажбур болушууда.

Депутат Бишкек шаары менен Суусамыр сыяктуу жогорку тоолуу аймактар үчүн бирдей чектөөлөрдү колдонууга болбой турганын баса белгиледи. Ал ар бир региондун өзгөчөлүктөрүн эске алууну сунуштап, суук жана тоолуу аймактар үчүн электр энергиясын камсыздоонун атайын режимин киргизүүнү же эң аз дегенде колдонуу лимитин көбөйтүүнү сунуштады.

Эскертүү керек, 2025-жылдын октябрынан 2026-жылдын мартына чейин Кыргызстан калкы үчүн электр энергиясын колдонууга 3 киловатттык чектөө коюлган.