Бишкекте 2-марттан бери өтүп жаткан Түрк дүйнөсүнүн балдар оюндары фестивалынын алкагында педагогдор үчүн окутуу сабактары башталды. Билим берүү министрлигинин маалыматына ылайык, иш-чаранын негизги максаты – салттуу балдар оюндарын популяризациялоо, түрк өлкөлөрүндөгү балдардын арасында маданий байланыштарды бекемдөө жана оюндардын бирдиктүү архивин түзүү.
Программага Кыргызстандан 30 педагог жана тарбиячы, ошондой эле Билим берүү министрлигинин бала бакча билим берүү башкармалыгынын начальниги Нурзида Касымова жана Түркиядан келген тренерлер катышууда. Окутуу «Маариф» билим берүү комплексинде өтүп, үч күнгө созулат.
Курс алкагында Түркиядан төрт оюн жана Кыргызстандан төрт улуттук оюн сунушталат, ошондой эле түрк элдери арасында алардын жайылышы боюнча методикалык иштер пландалган.
